பாராளுமன்ற வளாகத்தில் இரவு முழுவதும் தொடர்ந்த எதிர்க்கட்சிகளின் போராட்டம்

அடுத்த ஆண்டு நடைபெற உள்ள பாராளுமன்ற தேர்தலில் பா.ஜனதாவை எதிர்கொள்ள 26 எதிர்க்கட்சிகள் இணைந்து "இந்தியா" என்ற புதிய கூட்டணியை உருவாக்கி உள்ளது. எதிர்க்கட்சிகளின் ஆலோசனை கூட்டம் எதிர்க்கட்சி தலைவர் மல்லிகார்ஜூன கார்கே அறையில் நேற்று காலை நடந்தது. மணிப்பூர் விவகாரம் தொடர்பாக பாராளுமன்ற வளாகத்தில் போராட்டத்தில் ஈடுபடுவது என்று முடிவு செய்யப்பட்டது. அதன்படி பாராளுமன்றம் கூடுவதற்கு முன்பு எதிர்க்கட்சி எம்.பி.க்கள் ஆர்ப்பாட்டத்தில் ஈடுபட்டனர். பாராளுமன்ற வளாகத்தில் உள்ள காந்தி சிலை எதிரே எதிர்க்கட்சி உறுப்பினர்கள் போராட்டத்தில் ஈடுபட்டனர். மணிப்பூர் விவகாரத்தில் பிரதமர் மோடி பாராளுமன்ற இரு அவைகளிலும் அறிக்கை வெளியிட வேண்டும் என்று வலியுறுத்தி இந்த ஆர்ப்பாட்டம் நடைபெற்றது. மேலும், மாநிலங்களவையில் இருந்து ஆம் ஆத்மி எம்.பி. சஞ்சய் சிங் இடை நீக்கம் செய்யப்பட்டதை எதிர்த்தும் போராட்டத்தை தொடர்ந்தனர். இந்த போராட்டம் நேற்று இரவு முழுவதும் நீடித்தது. இந்த கூட்டணி கட்சிகளை சேர்ந்த எம்பிக்கள் தொடர் போராட்டத்தில் ஈடுபட்டனர். எதிர்க்கட்சிகளின் இந்த போராட்டம் இன்றும் தொடரும் என அறிவிக்கப்பட்டுள்ளது.